15 dagar með HeimVeru
Eitt lag og lítil hlustunartilraun á dag. Fimmtán dagar til að hlusta eftir jörðinni, náttúrunni og lífinu í kringum okkur.
Velja dagatal →HeimVera · SAMFÉLAG LÍFSINS
Tilraun
um lífið
Í hinu hversdagslega og smáa leynast tengsl okkar við heiminn.
HeimVera skoðar tengslin milli hugmynda, sjálfbærni, hönnunar og náttúru.
HeimVera — hljóðheimur
HugmyndirHugmyndir okkar móta það sem við sjáum, metum og gerum.
Hvar endum við og heimurinn tekur við?
Eitt af undrum þess að vera manneskja er að við getum endurskoðað hugmyndir, reynslu og gildismat. Hvað gæti breyst ef við hugsum um okkur sjálf sem þátttakendur í samfélagi lífsins? Sem hluta af náttúrunni, en ekki verur í náttúrunni?
Loftið verður að andardrætti. Vatn og næring verða hluti af líkama okkar. Mörkin milli okkar og umhverfisins eru raunveruleg, en þau eru líka opin.
NáttúraNáttúran er líka innra með okkur og forsenda þess að við lifum.
Tengslin við náttúruna hefjast ekki við útidyrnar eða bæjarmörkin. Við öndum að okkur lofti til að fá súrefni, við nærumst, endurnærumst og hvílumst í stöðugum samskiptum við umhverfið og náttúruna í kringum okkur.
SjálfbærniHeimili okkar nær langt út fyrir heimilið.
Maturinn sem við borðum, vatnið sem við drekkum og hlutirnir sem við kaupum eiga sér sögu. Og sú saga er samofin lífinu sjálfu. Það sem fer út hefur áhrif þar sem það endar. Heimilið er tengt vinnu fólks, innviðum samfélagsins og lífríki annarra staða.
Venjur okkar heima hafa því áhrif langt út fyrir veggi heimilisins. Hvað varðveitum við, lögum og deilum? Hverju hendum við? Hverju hlúum við að? Sjálfbærni birtist í þeim aðstæðum sem við tökum þátt í að móta með venjum okkar og gildismati, heima og heiman.
Heimilið veitir skjól en þarf líka að hleypa lífinu að: dagsbirtu, heilnæmu lofti, hreinu vatni og næringu. Samfélagið sem við búum í uppfyllir flóknar þarfir, en þarf líka að vinna með lífinu til að við þrífumst. Að taka eftir þessum tengslum getur byrjað þar sem við erum, með því að skoða það sem er þegar í kringum okkur.
HönnunHönnun getur nært lífið sem við erum hluti af.
Hvernig getum við nært það sem nærir okkur?
Hönnun gegnir mikilvægu hlutverki í því að búa lífi okkar umfjörð. Hönnun hefur mikil áhrif á það hvort umhverfið uppfylli þarfir okkar, bjóði upp á hvíld, öryggi og samveru; hvort ólíkir líkamar komast að og geta tekið þátt í samfélagi.
Endurnærandi hönnun spyr líka hvernig við getum hlúð að lífinu sem við erum hluti af og reiðum okkur á. Geta heimili, hverfi og innviðir verndað vatn, jarðveg og lífríki um leið og þau styðja og næra okkur?
DAGATÖL HeimVera
Lítil áminning
Nýtt sjónarhorn
Stundum fara dagarnir okkar í að sinna því sem kallar hæst. Við þurfum að sinna ótal verkefnum og standa undir ábyrgð. Það sem okkur þykir vænt um og langar að gefa tíma bíður kannski þar til meira svigrúm gefst.
Dagatöl HeimVera bjóða upp á litlar áminningar um tengsl og undur lífsins mitt í þessum hversdegi. Saga, spurning eða einföld tilraun getur opnað augun fyrir einhverju sem hefur farið fram hjá okkur. Vakið forvitni, kallað fram bros eða minnt okkur á það sem skiptir okkur máli. Kannski breytist þá eitthvað í því hvernig við mætum deginum, fólkinu í kringum okkur eða verkefnunum sem bíða.
Þú sækir dagatal og öll röðin kemur inn í dagatalið þitt í einu. Eitt ping á dag. Engin þörf á nýju appi eða skráningu. Enginn efnisstraumur og ekkert sem þarf að standa skil á. Þú ræður hvað þú tekur með þér.
Velja dagatal →Getur tæknin beint okkur frá tækninni?
Um tilraun HeimVera +
HeimVera gerir tilraun með að nota eins einfalda tækni og hægt er, sem krefst sem minnst af tíma okkar og athygli. Tækni sem opnar glugga inn í lífið og lætur okkur svo í friði.
Þess vegna dagatal. Eitt ping sem þú bregst við þegar þér hentar. Engin þörf á nýju appi eða notandareikningi, enginn efnisstraumur sem þarf að fylgja. Bara lítil áminning sem getur orðið upphaf að hugsun, samtali eða einhverju skemmtilegu sem þú prófar í hversdeginum.
Fólk er ekki söluvara
Tími okkar, athygli og forvitni eru dýrmæt. HeimVera vill ekki safna upplýsingum um fólk og áhugamál þess í þeim tilgangi að halda því lengur við skjáinn eða selja því eitthvað.
Þú þarft því ekki að stofna aðgang til að sækja dagatal. Þú sendir ekki svör við æfingum til HeimVera og þarft hvorki að skrá þátttöku þína né sýna fram á árangur. Það sem kviknar hjá þér má einfaldlega vera þitt.
Hugmyndin er að HeimVera geti haft tekjur af efni sem fólk kýs að kaupa. Markmiðið er að geta haldið áfram að bæta við efni og næra verkefnið.
Þótt HeimVera safni ekki upplýsingum í markaðsskyni geta gögn orðið til við notkun síðunnar. Hýsingarþjónustan getur til dæmis skráð heimsóknir, og Spotify og dagatalsforrit vinna með upplýsingar samkvæmt eigin persónuverndarreglum. HeimVera getur því ekki lofað því að engar upplýsingar um notkun verði skráðar.
Tæknin er líka siðferðilegt viðfangsefni
Þegar við veljum tækni skiptir máli að spyrja hvers konar lífi hún stuðlar að. Hvað auðveldar hún okkur? Hvað tekur hún frá okkur? Hver nýtur ávinningsins og á hverjum lendir kostnaðurinn?
Þessar spurningar snerta bæði athygli okkar og einkalíf, en einnig störf fólks, sköpun, vald og nýtingu náttúruauðlinda. Þessar spurningar verða ekki síður áleitnar þegar gervigreind á í hlut. Þótt tæknin sé þægileg og opni nýja möguleika þurfum við að huga að afleiðingum þess að nota hana.
Sú ígrundun á heima í HeimVera. Verkefnið snýst meðal annars um að sjá tengslin milli daglegra athafna okkar og þess heims sem þær eiga þátt í að móta.
HeimVera notar gervigreind
Hluti af HeimVera er unninn með aðstoð gervigreindar. Anna Lára Steindal er höfundur verkefnisins en nýtir tæknina við hugmyndavinnu, sköpun og miðlun. Hún ber ábyrgð á því efni sem birtist á vegum HeimVera.
Því getur fylgt þversögn að nota gervigreind til að hvetja fólk til að næra náttúrutengsl, hugsa um sjálfbærni og beina athyglinni frá tækninni. HeimVera gengst við þessu og tekur alvarlega umræðuna um áhrif gervigreindar á náttúru og samfélög. Þar koma meðal annars við sögu orku- og auðlindanotkun, vinnuaðstæður, höfundaréttur og samþjöppun valds.
Góður tilgangur réttlætir ekki sjálfkrafa allar leiðir að honum. Slík ígrundun verður líka að geta leitt til þess að við skiptum um skoðun. Tæknin getur hjálpað okkur að orða spurningar og komið auga á nýja möguleika. En á endanum er það á okkar ábyrgð að meta hvað við gerum við þá möguleika og hvort við getum látið þá þjóna samfélagi lífsins.
FRÁ TENGSLUM TIL TILRAUNAR
Hvað býður umhverfið
þér að gera?
Líttu í kringum þig þar sem þú ert.
Er eitthvað sem býður þér að njóta? Eiga samskipti? Hafa gaman? Hreyfa þig?
Veldu eitthvað eitt sem þig langar að gefa meira rými í deginum. Hugsaðu síðan um hvort lítil breyting í umhverfinu gæti gert það auðveldara.
Bók á náttborðinu. Gönguskór við dyrnar. Æfingafötin tilbúin þar sem þú sérð þau.
Laust sæti við borðið.
Þú getur prófað breytinguna og tekið eftir því hvort það verður auðveldara að gera þessa athöfn part af deginum. Kannski hjálpar hún. Kannski leiðir hún þig að annarri spurningu.
Taktu hugmyndina með þér heim ↗Fylgdu forvitninni
Hér finnur þú verkfæri til að mæta heiminum með nýjum hugmyndum. Orð geta vakið upp spurningar. Myndir kallað fram tilfinningu. Saga eða lag getur opnað nýjan eða gleymdan stað innra með þér. Þú getur byrjað þar sem eitthvað vekur áhuga þinn. Mátað hugmynd við eigin reynslu og leyft henni að hreyfa við þér. Prófað að leggja nýjan skilning í kunnuglegt orð. Verkfærin hafa þann tilgang að kveikja nýja hugsun og örva ímyndunaraflið - þú ræður hvað þú gerir við þau.
Lifandi orðabókin
Kunnuglegt orð getur opnað nýja sýn. Skoðum merkinguna sem við leggjum í orðin og hvað breytist þegar við hugsum þau upp á nýtt.
Kanna orðabókina →Tilfinningagalleríið
Hvernig viltu að þér líði? Kannaðu hvernig aðstæður vekja tilfinningar og hvernig þú getur gefið þeim rými heima.
Skoða galleríið →Hugleiðingar
Sögur og vangaveltur um hversdaginn, undrun og tengsl okkar við lífið. Spurningar sem mega fylgja okkur áfram.
Lesa hugleiðingar →Hugmyndabankinn
Hugmyndir geta hjálpað okkur að sjá tengsl sem áður voru hulin. Hér má kanna meðal annars líkamleika, ímyndunarafl, nægjusemi og samfélag lífsins.
Opna hugmyndabankann →Sáttmáli Jarðar
Stórar hugmyndir um sjálfbærni, réttlæti og umhyggju færðar nær hversdagslífinu.
Kanna Sáttmála Jarðar →Tónlist
Tónlist getur hreyft öðruvísi við okkur en texti einn og sér. Hvert lag ber með sér litla hugmynd til ígrundunar — eitthvað sem má finna fyrir, hugsa um og taka með sér inn í daginn.
Hlusta →
Við mótum heimilin okkar.
Heimilið mótar dagana okkar.
FRÁ HUGMYND AÐ HVERSDEGI
Heimilið sem
tilraunastaður
Við mótum heimilin okkar. Þau taka líka þátt í að móta dagana okkar.
Borð getur boðið til samveru. Stóll við glugga getur gefið hvíldinni stað. Hlutir sem eru innan seilingar geta auðveldað okkur að skapa, laga eða leika.
Á heimilinu mætast margar af stærstu spurningum lífsins í litlum, hversdagslegum athöfnum. Hvað þurfum við? Hvað fær pláss? Hvað varðveitum við? Hvernig viljum við verja tíma okkar og auðlindum? Hvaða gildismat endurspeglast í okkar nánasta umhverfi?
Þar getum við prófað hugmyndir um umhyggju, nægjusemi, sköpun og samveru - svo eitthvað sé nefnt. Það sem við lærum getur síðan fylgt okkur út í hverfið, í vinnuna og út í samfélagið.
Kannaðu heimilið með nýjum augum ↗ANNA LÁRA STEINDAL
Undrunin
kom fyrst
Ég heiti Anna Lára Steindal og er höfundur HeimVera.
Forvitni um lífið leiddi mig í heimspekinám og síðar í nám í sjálfbærnikennslu hjá Earth Charter, Jarðarsáttmálanum. Reynsla mín af fræðslu og mannréttindastarfi hefur mótað áhuga minn á því hvernig aðstæður geta gefið fólki færi á að taka þátt og lifa á eigin forsendum.
Lestu söguna: Undrunin kom fyrst →SAMSTARF
HeimVera og Sáttmáli Jarðar
HeimVera er samstarfsaðili Sáttmála Jarðar og byggir meðal annars á sýn hans um virðingu, umhyggju og sameiginlega ábyrgð gagnvart samfélagi lífsins.
